سینیرلار یوزولور

یئنی ادبیاتا دوغرو بیر آددیم

چیلله گئجه سی

      

       بیر آز دایان

بیر آز یوبان

چیلله گئجه سی

سونمه سین چیراغلار

پوزولماسین

رئکلاملارین رنگی چیخیشلاری

توکانلارین دئکورو

بیر آز دایان

یوخسول اوشاقلارین

حریص گوزلری

چکیلمه یب هله

بزکلی توکانلارین شوشه لریندن

بیر آز دایان

قارپوزلارا دویونجا

باخسینلار

دایان

نار دنه لرینی گؤزلرینه

سیخسینلار

سورسونلار باخیشلاریندا

دایان

ائله بوردا دایان

تبریک دئسینلر

اوزون عومور دیله سینلر

چیلله گئجه لری

چیلله چیلر

و سن

دایان

گور سحره

هانسی آتا آساجاق

اؤزونو ؟

تاواندان

لوستر یئرینه ....

 

 

حیدر عبادی ( باریش )

آردینی اوخو
دوشنبه 29 آذر 1395
بؤلوملر : سربست لر,

یئرسیز اؤلوم

سسیمی

هاردا قویلاجاقسینیز

دونیانین بوش یئری یوخ

دنیزده بوغسانیز

هاوادا  گومبولدایاجاغام

آتشه آتسانیز

تورپاقدان  دوغولاجاغام

اؤلوم

یئرسیز معنالانیر

قویلاماغا 

دونیانین 

بوش یئری 

یوخ .....


آردینی اوخو
جمعه 28 آبان 1395
بؤلوملر : سربست لر,

عشق دویوش مئدانی

 

  سنی

خیاواندا اوپه جه یم

یاساقلار دوراغیندا

سسیز موسافیرلرین گؤزلرینین اونونده

سنی باغریما باساجاغام

شه هرین ان بویوک مئیدانیندا

عشقه

دیرکلر قورولاندا

قوی ساچلاریندا مئه له نیم

الیمی الینه آل

خییاوان دولسو

کوچه لرین ان بوروغوندا

دیک دایان

عشق

دویوش مئیدانی

بوتون یاساقلار

یوزوله جک

بوردا......

.......



***********************************************


Səni

Xiyavanda öpəcəyəm

Yasaqlar dürağinda

Səssiz müsafirlərin  gözlərinin  önündə

Səni

Bağrıma  basacağam

Şəhərin  ən böyük  meydaninda

Eşqə

Dirəklər qürülanda

Qoy

Saçlarinda  mehlənim

əlimi  əlinə al

xiyavan dolusu

küçələrin  ən buruğunda

dik dayan

eşq  döyüş meydani

bütün  yasaqlar

yüzüləcək

burda....

......


آردینی اوخو
چهارشنبه 17 شهریور 1395
بؤلوملر : سربست لر,

بو شه هر یالان

 بو شه هر یالان

بو دونیا یالان

یاشایش

سئرچه سئرچه اوچور عوموردن

سحر قیرجان گونش

آخشام ایتیر گؤزدن

گوره ن بو گئجه کیمین

قوجاغینا سیغینیب

گونش

الدوزلار هانسی ناحاق تویا

چیتمیک چالیر

آی ایسه

هانسی خیانته

قاشلارین آلیر

کمان

کمان

 کمان

بو شه ر یالان

سئوگینی یالان باغیریلار

نفرتی یالان

بوتون آرابالار یابانجی

سیقناللار یالان

یولومو دئییرم گوتومور منی

گوتومورسنی

بیزی

ایکیمیزی

گوتورمور بو شه ر

اونومده پنجره لر قاپالی

کوچه لر گیجه لیر

گئجه لیر کوچه لر

دووارلار سیمیت

سیمیت

 سیمیت

سیمیت دووارلار

تانریجام

چینینی دایا  گؤزلریمه

بارماقلاریمین آجیسی دیر

گئجه لر

سیزلاییر

سنی.....

آردینی اوخو
یکشنبه 7 شهریور 1395
بؤلوملر : سربست لر,

مدرن سئوگی

  مدرن سئوگی

----------
سنی
مدرن دوشونورم
دوداقلارین قهوه قوخویور
گؤزلرینده دالغالانیر سؤزجوکلر
اوخویور
اللرین ساللانیر او تای خییاواندان
دیلیندن 
آرابالار سیقنال چالیر
ساچلارینین ترافیکینده
گیجه لمیش باخیشلاریم 
قالیر 

سنی 
مدرن خاطیرلاییرام 
شعرلریمده داها 
جئیران یئریمیر یئریشلرین
آت بئلینده ساچلارینا
نسیم دولاشمیر 
یئللره  قیسقانمیرام 
داها
اللرینین ریحان قوخوسونو ایتیرمیشم 
شه رین  نم هاراسیندا 

سنی
 مدرن آنلاییرام
چیراغلاری سونمه ین شه رین
گئجه لرینده
توستودن سورمه لنن گؤزلرین
آغینا وورولورام
لاله لر سولوخوب
یاناقلاریندان ایراق
لاله لر رنگ
اولابیلر..ده

سنی 
مدرن سئویرم
مرسدس آهلارینا اوزولورم
بنیزلریندن آخان پورشه لره
سانتافا صاندیغیندا
مئساژ گؤنده ریرم
بو محببته خییاوانلار قیسقانیر
کوچه لر یانیر
او تای یولدان ال ائدیرسن 
سئوگینی 
من ایسه گولومسه ییرم
سالامینی
گوشوندا آدیمی
نه سئیو ائله میسن قاداسی
هانسی نمره نده یم 
بوش وئر اوزولمه
منی دوشون
مدرنله شیریم
دوشونجه نی
سئوگینی
سنی .....


ح – ع - باریش

آردینی اوخو
یکشنبه 18 بهمن 1394
بؤلوملر : سربست لر,

شاعیرانه یاشام


شاعیرانه یاشام

-----------

 

بیر میصراع سن

بیر میصراع من

شاعیرانه گل

بئیتیمیز تاماملانسین

سئویرم تاوانا  دوزولسون

قوشلار

قارانقوشلار

لاپ بئله بایقوشلار

شئعیر کیمی

قیزینسین بئیتیمیز

ترله سین

شوشه لردن شاراب سوزولسون

ایستیرسن – سربست

ایستیرسن -  مدرن

پست مدرن

یوخسا

 بیر کلاسیک غزل کیمی

قافییه لنسین

بئیتیمیز

جان سن دئ

جان من دئییم

باشینا بوراخاق غزلی

بوردا

اوزانسین

دونیا دوردوقجا

سون میصراع نی

زامان

یازسین

 

 

ح- ع - باریش






 

آردینی اوخو
شنبه 12 دی 1394
بؤلوملر : سربست لر,

سون باهار ( پاییز )

    

           

سون باهار 


الوان رنگلرین گل گئدیشینده


خزان   ساز  چالیر


کولک    آواز


قوشلار کوچور


بوداقلار  اوشویور


یارپاقلارین  رنگی  قاچیر


ساپ   ساری  قولاقلارینا


کولک  پیچیلداییر   :


الینی  اوز


آییریل  بوداقدان  -  سوز


سارالا سارالا یاشاماقدان   


قیزارا قیزارا اؤلوم     یاخشیدیر


و یاز اومودیله


قیرمیزی اؤلومو سئچیر    یارپاق


سون باهار..........

آردینی اوخو
یکشنبه 5 مهر 1394
بؤلوملر : سربست لر,

سنی آغاجلارلا قازاجاغام

 
 

سنی


چیلیم چیلپاق


شهرین بوتون کوسگون آغاجلارینا قازاجاغام


باغیشلا منی


بالتالارین دادینی داداجاقسان


قورویاجاقسان  سیناجاقسان


بعضن  اوجاقلاردا تونقال


بعضن    شاختا چال ها چال


نه بیلیم


بلکه بیر یاز


 چینار آغاجیندا یاشایاجاقسان


گول آچاجاقسان


ساچلارین   یئللرده   اسن  یارپاق


قوللارین  قووتلی بوداق اولسون


آسیلاندا 


قوللاریندان   آسیلماق ایستردیم

آردینی اوخو
دوشنبه 19 مرداد 1394
بؤلوملر : سربست لر,

آزربایجان

  

بیر قوجاق  تبریز باغلادیم 
بیر دنیز   اورمو
بیر ساوالان   خیاو گؤتوردوم
بیر سهند اردبیل – شورا بیل
بیر  گونه باخان  خوی باخدیم
بیر مزار شمس
علی صدر درینلی بویدا  همدان  آغلادیم
سینه می داغلادیم
  اوجالدیم  
 سولطانیه  گونبزی  -    زنگان 
عشق  ائله بورادان باشلادی
اوره ک   دویونتوسو بورادان
و سوزولدو گؤزلریمدن بیر وطن
آذربایجان
اونونده    آیاغا قالخدیم
حورمتینه  پاپاغیمی  گؤتوردوم
و چنه م   سینه مه  دایاندی
جانیمدا بیر جان قازیلدی 
وطن آذربایجان
آذربایجان  


آردینی اوخو
چهارشنبه 10 تیر 1394
بؤلوملر : سربست لر,

باهار گلیر




باهار گلیر

قیشدا بیزدن کوسدو بئله

دوداغینی بوزوب گئدیر

گلین

گلین یولا سالاق

دوم آغ تئللرینی

سازاق چالان دیللرینی

بوز باغلا یان  اللرینی

اوزوب گئدیر

هاوادا بیر ایستی لیک وار

نه وار نه وار

باهار گلیر

************

سیلکه لنیر قوجا داغلار

یاشیل لانیر بیزیم باغلار

قیچی اوسته دؤنموش قارلار

داملا داملا یولا دوشوب

داغ باشیندان سوزوب سوزوب

آخیر  گئدیر اویلاقلاردان

او یایلاقدان بو یایلاقدان

خبر گلیر یاخینلاردا ن

اوزاقلاردان

یاشیل دونون گئیر چینار

نه وار نه وار

باهار گلیر

**************

بوزولموش دوداغین – لاله آچیر

شئحدن دولور پیاله سی

دورنالارین گویدن سسی

یایملانیر  یئر اوزونه

یول یئرییر شلاله لر

دره لرین سوکوتونو

خاریلداییر سئللرینده

بیر نغمه وار دیللرینده

 شاعیر لرین شئعیرلرینده

الهام داها

قاینار جوشار

نه وار نه وار

باهار گلیر

*************

بسته بویلو بیزیم قیزلار

یاز سحری دان اولدوزلار

بو باغا گزمه یه گلین

بنووشه نی اوزمه یه گلین

یاخانیزا دوزمه یه گلین

قاپینیزدا بئی دایانیب

قلم قاشلی بیزیم گلین

اینجه بئللی ایستکاندا

بیر چای دمله بنووشه دن

دینله ییرمیسن سسی ؟

او کووشندن بو کووشندن

بولبول سالیب های هاوار

نه وار نه وار

باهار گلیر

**********

دیلرینین یاخاسین آچ

یاناغیندان اؤپسنده اؤپ

شلاله تک قارا زولفی

داغیتگینان بو یئللره

سئوگی قوخو بو چوللره

بولبولون خوش نغمه سیندن

بیر دسته گول باغلاگینان

بیر ماهنینی دوداق آلتی

قولاغینا آغلاگینان

دوداق قاچسین

گولومسه سین نازلی  نیگار

نه وار نه وار

باهار گلیر

**********

باریش ایستر ذوق آلیسین

طبیعتدن بوتون ائللر

دیللر سوسور سوسسون داها

دانیشسین قوی آلا گوزلر

شئعیر بیتمک ایسته مه ییر

ناز ایسته ییر سانکی دیلبر

من شئعیرین نازین چکرم

شئعیر الیندن مئی ایچرم

بویو بسته بسته کاریم

بیر بسته قوی شئعیر اوسته

کوکلنسین سازین گلسین

نغمه ن آوازین گلسین

طبیعتین قیز چاغیدیر

الولان گئیینسین قیزلار

نه وار نه وار

باهار گلیر

باهار گلیر

 

 

8/12/ 93

حیدر عبادی ( باریش )

 
( یئنی ایلده سیزلره جان ساغلیغی و اوغورلار دیله ییرم . یئنی ایلینیز موتلو اولسون )

آردینی اوخو
پنجشنبه 28 اسفند 1393
بؤلوملر : سربست لر,